4 წლიანი კულტურულ-გასართობი ცენტრის „თავსატეხის“ ისტორია დროებით შეჩერებულია. თელავისთვის და განსაკუთრებით ახალგაზრდებისთვის საყვარელი სამაგიდო თამაშების სივრცე წელიწადნახევარია რაც დაკეტილია. თამაშების ბიბლიოთეკა, რომელიც 100-ზე მეტ თამაშს იტევს მოთამაშეების მოლოდინშია. თავისმხრივ მოთამაშეები კი სივრცის ახლიდან გახსნას ელოდებიან.
„თავსატეხი“ არასოდეს ყოფილა მხოლოდ თამაშების კლუბი. ის იყო სოციალიზაციის, განვითარების და საზოგადოებრივი ჩართულობის ცენტრი. ბავშვებიდან მოყოლებული ყველა თაობის ადამიანებს აერთიანებდა და ქალაქს ახალი სიცოცხლე შესძინა.
2024 წლის ზაფხულში სკვერის რეაბილიტაციის გამო, სადაც „თავსატეხი“ მდებარეობდა - შენობის დემონტაჟი მოხდა და მისი კარიც დროებით დაიხურა. მაგრამ მის მიმართ ინტერესი არასოდეს გამქარალა.
დიდი მონატრების შემდეგ გაჩნდა რეალური შანსი, რომ “თავსატეხი” ისევ დაუბრუნდეს ქალაქს.უფრო დიდ და კეთილმოწყობილ სივრცეში, უფრო მეტი ფუქციითა და რესურსებით, არა მხოლოდ სამაგიდო თამაშების კლუბი - არამედ საზოგადოებრივი ცენტრი.
ორბელიანი მეტის დახმარებით ვიწყებთ სახალხო დაფინანსების ერთთვიან კამპანიას, რათა შევაგროვოთ შესაბამისი თანხა ყველა საჭიროების დასაფარად რაც ახალი „თავსატეხის“ ვიზიტორებისა და მეგობრებისთვის საინტერესო სივრცის შექმნაში დაგვეხმარება.
რას გავაკეთებთ ამ თანხით
გავარემონტებთ და განვაახლებთ „თავსატეხის“ ახალ შენობას.
მოვაწყობთ საკონფერენციო ოთახს და ავღჭურვავთ მას შესაბამისი ტექნიკით.
საკონფერენციო ოთახს ასევე ექნება კინო ჩვენებების ფუნქცია, რომელიც კინომანებს გააერთიანებს. ეს სივრცე გათვლილია 30-40 ადამიანზე და სეანსები გაიმართება „თავსატეხის“ კინო კლუბის ორგანიზებითა და ინიციატივით.
აპარატურით ავღჭურვავთ საკონცერტო სივრცეს, რომელიც 150-მდე ადამიანს იტევს. ამ სივრცეში გაიმართება ხოლმე კონცერტები, საქველმოქმედო საღამოები, თეატრალური დადგმები. ასევე სივრცე უმასპინძლებს თელავის „რა? სად? როდის?“ კლუბის მიერ ორგანიზებულ ინტელექტუალურ თამაშებსა და შეჯიბრებებს გუნდებს შორის
გავარემონებთ ბარის სივრცეს, სადაც უკვე არის შესაბამისი ავეჯი (რბილი და კომფორტული დივნები და მაგიდები) რათა სამაგიდო თამაშების მოყვარულებმა დრო სასიამოვნოდ გაატარონ.
ცალკე სივრცეში მოვაწყობთ როლური თამაშების ოთახს, რომელიც სრულად მიეძღვნება ისეთ პოპულარულ თამაშებს როგორებიცაა: „მაფიის ღამე“, „ავალონი“ და სხვა.
სამაგიდო თამაშების კლუბისთვის შევიძენთ ახალ თამაშებს და განვაახლებთ ჩვენს ბიბლიოთეკას.
ამ ინიციატივის განსახორციელებლად თქვენი მხარდაჭერა გვჭირდება! თუნდაც ერთი ლარის ჩარიცხვით ჩნდება შანსი, ისევ დაუბრუნდეს ძველი ხალისი თელავს. გააკეთე დონაცია, დაუდექი მხარში „თავსატეხს“ და შესძინე მას მეორე სიცოცხლე!
