ერთად მოვაწყოთ საზოგადოებრივი სივრცე ,,ჩვენი სენაკი“

კამპანიის შინაარსი

,,ჩვენი სენაკი" რამდენიმე წლის ისტორიას ითვლის. ამ პერიოდის განმავლობაში, სენაკის სიყვარულით გაერთიანებულმა ადამიანებმა შევძელით და თავი მოვუყარეთ ასობით მასალას სენაკის შესახებ - ისტორიულ ფოტოსურათებს, ანტიკვარულ ნივთებს, არტეფაქტებს, ძველ წიგნებს, რუკებსა და სხვა დოკუმენტებს.

ჩვენ ასევე ვქმნით და შემდეგ სოციალური გვერდების საშუალებით აქტიურად ვაზიარებთ საინტერესო და იშვიათ მასალებს სენაკის შესახებ, - სტატიებს, ინტერვიუებს, პუბლიკაციებს, შემეცნებით ვიდეოებს... ამავდროულად, ჩვენი საქმიანობა არ შემოიფარგლება მხოლოდ წარსულისა და კულტურული მემკვიდრეობის შესწავლით, - ჩვენ ხშირად ვეხმაურებით სენაკისთვის საჭირბოროტო მიმდინარე საკითხებს და შესაბამისად, აქტიურად ვიწვევთ საზოგადოებას დისკუსიაში.

წელს გადავწყვიტეთ ჩვენი საქმიანობა გაგვეფართოვებინა და ონლაინ აქტივობასთან ერთად შეგვექმნა გარემო, სადაც ადგილობრივები, ქალაქის სტუმრები, ახალგაზრდები და სხვა დაინტერესებული პირები შეძლებდნენ მოსვლას და ჩვენ მიერ წლების განმავლობაში დაგროვებული მასალების გაცნობა-გამოყენებას. ამავე სივრცეში თავისუფლად შეგვიძლია მოვაწყოთ სხვადასხვა თემატური ღონისძიებები, - წიგნის პრეზენტაცია, საინტერესო ადამიანთან შეხვედრა, საჯარო დისკუსია, პოდკასტების ჩაწერა, ფილმის ჩვენება და ა.შ. აქ ასევე შეგვიძლია ვიმსჯელოთ იმ ახალ იდეებზე, რომელთა შეთავაზება შეგვიძლია ადგილობრივი საკრებულოსთვის ან სხვა პროექტების ფარგლებში განხორციელება.

ჩვენ უკვე გვაქვს კეთილმოწყობილი ფართი ქალაქის ცენტრში, რომელიც უსასყიდლოდ დაგვითმო ადგილობრივმა მესაკუთრემ, თუმცა დამატებით ვსაჭიროებთ სხვადასხვა ტიპის ავეჯს, ტექნიკურ მოწყობილობას, უსაფრთხოების სისტემასა და გვერდითა ფასადის რეაბილიტაციას.

იმედი გვაქვს ადგილობრივი საზოგადოების ჩართულობითა და მონაწილეობით შევძლებთ მოვაწყოთ სივრცე ,,ჩვენი სენაკისთვის", რომელიც იქნება ყველა სენაკელის მასპინძელი მიუხედავად განსხვავებული პოლიტიკური თუ სხვა სახის შეხედულებებისა და მთლიანად მიეძღვნება ჩვენს ქალაქზე ზრუნვას, მის გარშემო კვლევა-ძიებას, მუშაობას და ამ პროცესის ადგილობრივებისთვის გაზიარებას!