არჩევნებზე დაკვირვება სახალხო დაფინანსების გზით

კამპანიის შინაარსი

2021 წლის 2 ოქტომბერს დაგეგმილია მუნიციპალიტეტის ორგანოთა არჩევნები, რომელსაც მნიშვნელოვანი როლი ენიჭება ქვეყნის დემოკრატიული განვითარების პროცესში. მიუკერძოებელი და პროფესიონალი ადგილობრივი დამკვირვებელი ორგანიზაციები გადამწყვეტ როლს ასრულებენ დემოკრატიზაციის პროცესის განმტკიცებისა და არჩევნებისადმი საზოგადოების ნდობის გაზრდის თვალსაზრისით.

განვითარების და დემოკრატიის ცენტრის (CDD) შესახებ

განვითარებისა და დემოკრატიის ცენტრი (CDD) დემოკრატიულ პრინციპებზე დაფუძნებული, წარმომადგენლობითი ორგანიზაციაა საქართველოში, რომელიც 2008 წლის 26 თებერვალს დაარსდა. ორგანიზაციის პრიორიტეტული მიმართულებებია: არჩევნების მონიტორინგი, მოქალაქეთა უფლებების დაცვა და ადვოკატირება, მათი ინფორმირებულობა მიმდინარე რეფორმებისა და პროცესების შესახებ.

CDD-ის საარჩევნო გამოცდილების შესახებ

მიგვაჩნია, რომ დემოკრატიზაციის პროცესი ჩვენი ქვეყნისა და საზოგადოებისათვის უმნიშვნელოვანესი პრიორიტეტია, არჩევნები კი დემოკრატიის ქვაკუთხედი. დაარსების დღიდან, საქართველოში დემოკრატიზაციის პროცესის ხელშეწყობა და საარჩევნო გარემოს გაუმჯობესება, განვითარებისა და დემოკრატიის ცენტრის (CDD) ერთ-ერთი მთავარი მიზანია. CDD-ის საარჩევნო სფეროში მოღვაწეობის 10 წელი მოიცავს: არჩევნების დაკვირვებას, ამომრჩეველთა განათლებას, პოლიტიკური პარტიების განვითარების ხელშეწყობას, მნიშვნელოვან საინფორმაციო კამპანიებს, საკანონმდებლო ცვლილებების ადვოკატირების წარმატებულ პროცესსა და არაერთ კონკრეტულ შედეგს. არჩევნების დაკვირვების საერთაშორისო პრინციპებითა და მეთოდოლოგიით, ჩვენმა სადამკვირვებლო მისიამ, საერთაშორისო დონორების მხარდაჭერით, 2010-2020 წლებში განახორციელა 20 სხვადასხვა სახის არჩევნების მონიტორინგი საქართველოში. 2021 წლის მუნიციპალიტეტის ორგანოთა არჩევნების მონიტორინგი რიგით მე-21 მისიაა CDD-სთვის.

სადამკვირვებლო მისია 2021

მუნიციპალიტეტის ორგანოთა 2021 წლის 2 ოქტომბრის არჩევნების მონიტორინგის მიზნით, განვითარებისა და დემოკრატიის ცენტრი (CDD) კანონმდებლობით დადგენილი წესით, 18 აგვისტოს დარეგისტრირდა ცესკოში ადგილობრივ დამკვირვებელ ორგანიზაციად. CDD-ის სადამკვირვებლო მისია მოიცავს სრული საარჩევნო ციკლის - წინასაარჩევნო, არჩევნების დღისა და არჩევნების შემდგომი პერიოდის მონიტორინგს. ჩვენ ვგეგმავთ 100-კაციანი სადამკვირვებლო მისიის განხორციელებას, რომელიც მოიცავს შერჩევით საარჩევნო ოლქებს საქართველოს რეგიონებიდან. ჩვენ აგრეთვე დავაკვირდებით №4 კრწანისის საარჩევნო ოლქში ხმის მიცემის და დათვლის პროცედურების განხორციელებას ელექტრონული ტექნოლოგიების გამოყენებით. CDD-ის სადამკვირვებლო მისია, რომელსაც ხელმძღვანელობს ორგანიზაციის აღმასრულებელი დირექტორი ქეთევან ჩაჩავა, აერთიანებს პროფესიონალ გუნდს, გრძელვადიან და მოკლევადიან დამკვირვებლებს, მობილურ ჯგუფებს, საინფორმაციო ცენტრს (ცხელი ხაზი), სამართლებრივ და ანალიტიკურ ჯგუფს.

გრძელვადიანი და მოკლევადიანი დამკვირვებლები შეირჩევიან CDD-ის დამკვირვებელთა ქსელიდან, რომელიც აერთიანებს 500-ზე მეტ მიუკერძოებელ, კვალიფიციურ, გამოცდილ და მოტივირებულ დამკვირვებელს ქვეყნის ყველა რეგიონიდან. CDD-ს სადამკვირვებლო მისიის პრინციპები 10 წლიანი სადამკვირვებლო ისტორიის განმავლობაში კვლავაც უცვლელია: კანონის უზენაესობის პატივისცემა; დამოუკიდებლობა; მიუკერძოებლობა; სიზუსტე; გამჭვირვალობა; თანამშრომლობა და პროფესიონალიზმი.

ჩვენთვის მნიშვნელოვანია თქვენი მხარდაჭერა 2021 წლის მუნიციპალიტეტის ორგანოთა არჩევნებზე სადამკვირვებლო მისიის განსახორციელებლად.

2020 წელს, პირველად ქართული ადგილობრივი სადამკვირვებლო ორგანიზაციების ისტორიაში, CDD-იმ არჩევნების დაკვირვებისთვის ინოვაციურ მიდგომას მიმართა და საჭირო რესურსებისთვის თანადაფინანსების მოპოვება Crowdfunding-ის საერთაშორისო პლატფორმის მეშვეობით შეძლო. ერთ-ერთ ყველაზე პოპულარულ პლატფორმის – Gofundme.com საშუალებით CDD-იმ, 125 კონტრიბუტორის დახმარებით, მნიშვნელოვანი რესურსის მობილიზება მოახერხა. კამპანიაში ჩაერთვნენ სხვადასხვა ქვეყნიდან როგორც რიგითი მოქალაქეები, ისე საერთაშორისო ორგანიზაციები და პარტნიორები. იხილეთ ვრცლად https://bit.ly/3tDijyD თქვენი მხარდაჭერით, ჩვენ ვიქნებით პირველი სამოქალაქო საზოგადოების ორგანიზაცია საქართველოში, რომელიც ადგილობრივ სადამკვირვებლო მისიას განახორციელებს უკვე ქართული ქრაუდფანდინგის პლატფორმის გამოყენებითა და სახალხო დაფინანსების გზით. თქვენი თანადგომა იქნება დიდი მოტივაცია, შთაგონება და მხარდაჭერა ყველა იმ ადამიანის თუ ადამიანთა ჯგუფისთვის, რომლებიც მსოფლიო თავისუფლებისა და დემოკრატიისათვის ბრძოლის წინა ხაზზე არიან.