კამპანიის შინაარსი

დღეს გოგონებს საკმაოდ დიდი მიზნები გვაქვს. გვინდა გავხდეთ საუკეთესო ბიზნესვუმენები, იურისტები, ფინანსისტები, მომღერლები... თუმცა რეალურად დროდადრო ნაკლებად თავდაჯერებულები ვართ, ზოგჯერ ზოგიერთი სტერეოტიპი და სოციუმის დამოკიდებულება ჩვენს მიმართ გვაფერხებს. ხშირად ვხვდებით ისეთ სიტუაციაში, როდესაც კომფორტის ზონიდან უნდა გამოვიდეთ, იმისთვის რომ იმას მივაღწიოთ, რაც გვინდა, ეს კი გვაშინებს. ზოგჯერ კი იმდენად ბევრს ვითხოვთ საკუთარი თავისგან, რომ ძალიან ვისტრესებით...მეც სწორედ ასე ვარ, თუმცა არის რაღაცა, რაც ყოველთვის მაძლიერებს...   წლების წინ ერთ დღეს პაპამ დამიძახა და მთხოვა მის საწოლთან დავმჯდარიყავი. მითხრა, რომ ცხოვრება ხანმოკლეა და ყოველთვის უნდა ვაკეთო ის, რისიც მჯერა, უნდა ვეცადო და მუდამ ვიშრომო იმისთვის, რომ ჩემი  ოცნებები რეალობად ვაქციო. შემდეგ მომცა ბეჭედი, რომელიც ქარხანაში მუშაობის დროს დაამზადა. პაპა ერთი თვეში გარდაიცვალა ლეიკემიისგან. ზუსტად ვერ გავიაზრე რას მეუბნებოდა მაშინ, რადგან მხოლოდ 6 წლის ვიყავი, თუმცა მისი ეს სიტყვები სამუდამოდ ჩაიბეჭდა ჩემს გონებაში. წლების განმავლობაში ეს აქსესუარი იყო სიმბოლო იმის, რომ პაპას სჯეროდა, მე შემეძლო ჩემი ოცნებების რეალობად ქცევა. ეს კი ბევრჯერ დაეხმარა გამოვსულიყავი ჩემი კომფორტის ზონიდან, მაგალითად, გამეკეთებინა პრეზენტაცია, გამომეთქვა საკუთარი აზრი საჯაროდ, წამოვსულიყავი სამსახურიდან და უფრო მეტი ენერგია ჩამედო ჩემს წამოწყებაში.... ეს მოგონება გახდა ჩემი შთაგონების წყარო, შემექმნა ისეთი პროდუქცია, რომელიც გაახსენებდა ჩემნაირ გოგონებს, რომ მათი სჯერათ და ყველაფრის მიღწევა შეუძლიათ ცხოვრებაში, რასაც მოინდომებენ და მიზნად დაისახავენ. ასე დაიბადა ბრენდი -„ლილიტის“ შექმნის იდეა. ამჟამად, ძირითადად, ვამზადებთ ხის გულსაბნევებს, რომლის თემატიკაც არის გოგონები, მათი ინტერესები, ოცნებები.. ჩვენი მთავარი მიზანია გოგონებს შთავაგონოთ თავდაჯერებულობა, საკუთარი თავის სიყვარული და გავახსენოთ ის მოგონებები, რომლებიც მათთვის ძალის შემმატებელია. მჯერა, რომ ყველას ცხოვრებაში არსებობს ისეთი ისტორიები, რომლებიც დადებით ემოციებით გვავსებს და თავდაჯერებულობას გვმატებს. ჩვენ გვინდა რომ ეს ისტორიები გადავიტანოთ ჩანთებზე, ქეისებზე, მაიკებზე... ასევე გვსურს ჩვენ პროდუქციით ის სტერეოტიპები დავამსხვრიოთ, რაც ჩვენს საზოგადოებაშია გამეფებული. თქვენი დახმარებით გვინდა ასეთი საინტერესო და უნიკალური დიზაინების ჩანთები, მაიკები, ტელეფონის ქეისები და სტიკერები დავამზადოთ. მე ნინიკო ვარ, უკვე დაახლოებით მეორე წელია, რაც „ლილიტი“ შევქმენი და აქტიურად ვმუშაობ. ძალიან მიყვარს და დიდ სიამოვნებას მანიჭებს საინტერესო დიზაინების შექმნა, ასევე, არანაკლებ მიყვარს კომუნიკაცია ჩვენს სუპერგოგონებთან და მათთის შეკვეთის გამზადებასთან ერთად პატარა წერილის მიწერა. „ლილიტის“ მხარდაჭერასთან ერთად ჩემს დიდ ოცნებასაც დაუჭერთ მხარს. იმედი მაქვს ერთად შევძლებთ რომ ბევრ გოგონას შთავაგონოთ რომ ისინი არიან საკუთარი თავის გმირები და ყველაფრის მიღწევა შეუძლიათ რასაც მოინდომებენ.   ჩვენი საკონტაქტო ინფორმაცია ? FB: https://www.facebook.com/accessorieslilith Instagram: https://www.instagram.com/accessorieslilith/ მობ: (+995) 598771880 [gallery ids="15962,15964,15966,15968,15970,15982,15980,15978,15976,15974"]