კამპანიის შინაარსი

არასწორად შერჩეული პროფესია ადამიანებში ყოველდღიურ სტრესს, მოტივაციის დაკარგვას და კარიერული განვითარების შეფერხებას იწვევს.

ხშირად, ახალგაზრდები პროფესიას ირჩევენ შეზღუდული ინფორმაციის პირობებში, მხოლოდ ახლობელი ადამიანების  რჩევებსა და საზოგადოებაში გავრცელებულ სტერეოტიპებზე დაყრდნობით, რაც იშვიათად ითვალისწინებს მათ რეალურ უნარებსა და ინტერესებს. შედეგად, მათი დრო და ენერგია არასწორი მიმართულებით იხარჯება.

დღეს განსაკუთრებით მნიშვნელოვანია, მოზარდებს ჰქონდეთ ინფორმაცია მოთხოვნად პროფესიებსა და განათლების სფეროში არსებულ ალტერნატივებზე, რათა კარიერული გზა თავიანთი უნარებისა და ინტერესების შესაფერისად დაგეგმონ.

სწორედ ამიტომ, სმარტ აკადემიამ, HR პროფესიონალებთან ერთად, მუშაობა დაიწყო „თანამედროვე პროფესიების გზამკვლევზე“ – რომელშიც თავდაპირველად გაგაცნობთ 50-მდე თანამედროვე, მოთხოვნად და პერსპექტიულ პროფესიას. გზამკვლევი მოიცავს ისეთ მნიშვნელოვან საკითხებს, როგორებიცაა: საქმიანობის სფეროს შესახებ ინფორმაცია, შესაბამისი ტექნიკური თუ რბილი უნარები, სამუშაო პროცესის აღწერა, საშუალო ანაზღაურება და პროფესიასთან დაკავშირებული სხვა სპეციალობების ჩამონათვალი.

ორბელიანი მეტის დახმარებით, გზამკვლევის ბეჭდურ ვერსიას განვათავსებთ რეგიონების მულტიფუნქციურ სივრცეებსა თუ სხვა სასწავლო დაწესებულებებში. ასევე, ბეჭდურ ვერსიასთან ერთად ვქმნით ვიდეო პლატფორმას – პროფესიების ციფრულ ბიბლიოთეკას, რომელიც ახალგაზრდებს საშუალებას მისცემს ერთ სივრცეში, ონლაინ, სახლიდან გაუსვლელად გაეცნონ პროფესიებს. ამის პარალელურად იგეგმება კარიერული კონსულტაციების სერია რეგიონებში, რომელიც ახალგაზრდებს თავიანთი უნარებისა და ინტერესების სწორად მიმართვაში დაეხმარება.

ჩვენი ინიციატივის ფარგლებში ასევე ვქმნით მაფიის ალტერნატიულ სამაგიდო თამაშს – „პროფესია“, სადაც თამაში წარიმართება ახალი წესებით და ტრადიციული როლები ჩანაცვლდება თანამედროვე ციფრული სპეციალობებით, რაც გაზრდის ცნობადობას თითოეულ პროფესიაზე. 

ჩვენ გვჯერა, რომ გზამკვლევი არის საუკეთესო რესურსი პროფესიების მაძიებელთათვის. თქვენი მხარდაჭერით შევძლებთ, ეს პროდუქტი ხელმისაწვდომი გავხადოთ და მეტ ადამიანს დავეხმაროთ ინფორმირებული კარიერული გადაწყვეტილების მიღებაში.