ერთად ავაშენოთ „ბრილი-არტი“ მაღალმთიან აჭარაში

კამპანიის შინაარსი

მაღალმთიანი აჭარის მრავალფეროვანი ბუნება, მთის ჰაერი, ისტორიულ- კულტურული ძეგლები, ტრადიციული სამზარეულო და მოსახლეობის სტუმართმოყვარეობა უნიკალურ პირობებს ქმნის კულტურული და აგრო ტურიზმის განვითარებისთვის. მიუხედავად ამისა, სოფელი ბრილი მოსახლეობისაგან მაინც იცლება: თოთხმეტი წლის წინ სოფელში 100 ბავშვი სწავლობდა, წელს კი მხოლოდ 21 მოსწავლეა შემორჩენილი. ადგილობრივები დღეს თავს ირჩენენ მესაქონლეობით და ეკოლოგიურად სუფთა პროდუქციის წარმოებით, მაგრამ ტურიზმის ნაკლებობის გამო, ფინანსური შემოსავლები მწირია, რაც განაპირობებს მიგრაციას სოფლიდან!

ბრილი ფლობს უნიკალურ ბუნებრივ რესურსს -- თიხის საბადოს სახით, თუმცა მას მოსახლეობა მხოლოდ ტალახად აღიქვამდა, სანამ ჩემი კერამიკული აქტივობებით არ დავუმტკიცე, რომ სწორედ ამ თიხის გარდაქმნაა შესაძლებელი ძვირფას, შემოსავლიან პროდუქტად!

ჩვენი პროექტი გულისხმობს სოფლად, ზედ თიხის კარიერზე, ჩვენივე ძალებით აშენებული, შავი კარკასის მდგომარეობაში მყოფი სახელოსნოს მოწყობას, სადაც შეიქმნება მულტიფუნქციური სივრცე. ,,ბრილი-არტში“ თიხის გამოყენებით ჩავატარებთ საგანმანათლებლო პროგრამებს, მასტერკლასებს და საერთაშორისო სიმპოზიუმებს. ეს ხელს შეუწყობს ბრილის მოსახლეობის, კერძოდ -- ახალგაზრდების პროფესიულ განვითარებას, მათ ჩართვას ეკონომიკურ საქმიანობაში და კერამიკის, როგორც ტრადიციული რეწვის პოპულარიზაციაში.

ამგვარად, „ბრილი-არტის“ სწორი და თანმიმდევრული სტრატეგიით, ურთიერთ პატივისცემით, პირადი მაგალითით, კულტურული და ეკონომიკური პერსპექტივის შექმნის საფუძველზე, მოსახლეობას განვუმტკიცებთ სოფლად ღირსეული ცხოვრების შესაძლებლობისადმი რწმენას. გვწამს, თითოეულ ადამიანს ექნება შანსი -- დარჩეს, განვითარდეს და განახორციელოს საკუთარი პოტენციალი მშობლიურ სოფელში/რეგიონში.