,,Bookmobile’’ არის ბათუმელების & ნეტგაზეთის სპეცპროექტით შექმნილი, მულტიფუნქციური ავტომანქანა, რომელიც მალე ჟურნალისტებთან და სხვადასხვა საინტერესო ადამიანებთან ერთად დაიწყებს მოგზაურობას აჭარის მაღალმთიან სოფლებში.
საქართველოს მაღალმთიან სოფლებში, მათ შორის აჭარაში, სასკოლო ასაკის ბავშვები და ახალგაზრდები მოკლებულნი არიან არაფორმალური განათლების შესაძლებლობას. აჭარის რაიონულ ცენტრებში არ არის წიგნის მაღაზიები, სოფლის სკოლის ბიბლიოთეკები ღარიბია, იშვიათად იმართება შეხვედრები სხვადასხვა, ახალგაზრდებისთვის საინტერესო თემებზე, უკვე ათწლეულებია არ არსებობს კინოკლუბები. არსებულ სიტუაციაში განათლების მიღების ერთადერთ წყაროდ რჩება სკოლა, რომელიც ძირითადად ფორმალური განათლების წყაროა და სრულად ვერ პასუხობს მოსწავლეებისა და ახალგაზრდებს მოთხოვნებს, რომელთა უმრავლესობა ადრეული ასაკიდანაა ჩართული სამეურნეო საქმიანობაში და ხშირად მეზობელ ქვეყანაში, თურქეთშიც გადადიან სამუშაოდ.
პროექტი, რომლის თანადაფინანსების - წიგნების შესყიდვის კამპანიისთვის მოგმართავთ, ითვალისწინებს აჭარის რეგიონში სოფლად მცხოვრებ ბავშვებსა და მოზარდებს შორის კითხვისადმი ინტერესის გაღვივებას.
კერძოდ, აჭარაში, არანაკლებ 65 მაღალმთიან სოფლის/სკოლის ბიბლიოთეკებისთვის თანამედროვე მხატვრული თუ სპეციალობების შესაბამისი წიგნების საჩუქრად მიწოდებას. ბავშვებისა და მოზარდების წიგნიერება ეკონომიკური და სოციალური განვითარებისათვის სტრატეგიული მნიშვნელობის საკითხია. ეს განსაკუთრებით ეხება სოციალური პრობლემების მქონე მოსახლეობას, რომელსაც შეზღუდული ეკონომიკური პოტენციალი აქვს. წიგნიერებას გადამწყვეტი მნიშვნელობა აქვს განათლების, ცხოვრების მოწყობისა და სოციალური ჩართულობის თვალსაზრისით და, აქედან გამომდინარე, სიღარიბის დაძლევისა და მდგრადი და მშვიდობიანი განვითარების უზრუნველყოფის თვალსაზრისითაც.ბიბლიოთეკებისთვის წიგნების საჩუქრად გადაცემის გარდა, პროექტის ფარგლებში დაგეგმილია მობილური ბიბლიოთეკით ექსპედიციები, რომლებიც ბავშვებსა და მოზარდებში წიგნიერების დონის ამაღლებაში ჩართულობას შეუწყობს ხელს. ექსპედიციაში საქართველოს ყველა კუთხიდან ჩაერთვებიან მოხალისეები, რომლებიც ბავშვებს წაუკითხავენ ლექციებს, უჩვენებენ შთამაგონებელ ფილმებს და ესაუბრებიან მათთვის საინტერესო და მნიშვნელოვან თემებზე.
