ამბები ჩვენზე

რა არის CROWDFUNDING?

სახალხო დაფინანსება იგივე Crowdfunding პრინციპია, რომელიც ეხმარება ადამიანებს საკუთარი იდეები აქციონ რეალობად, მოიპოვონ საკმარისი დაფინანსება საკუთარი პროექტების და სოციალური ინიციატივების განსახორციელებლად.

სახალხო დაფინანსების (Crowdfunding) მთავარი იდეა ბევრი ადამიანის მიერ, ერთიანი ძალისხმევითა და აქტიური ჩართულობით საერთო პროექტების განხორციელებაა! ქრაუდფანდინგის (სახალხო დაფინანსების) უპირატესობა იმაში მდგომარეობს, რომ დაფინანსების მოპოვება ბანკების, სხვადასხვა ფონდებისა და ბირჟების მონაწილეობის გარეშე შეიძლება. ეს უფრო დემოკრატიული მეთოდია- ონლაინ სივრცეში დიდი რაოდენობის პოტენციურ დამფინანსებელთან გეძლევა საკუთარი იდეის წარდგენის საშუალება.

ქრაუდფანდინგი საშუალებას იძლევა, რაც შეიძლება მეტი ადამიანი დაინტერესდეს თქვენი იდეით, რომელიც სასიკეთო ცვილებას მოუტანს საზოგადოებას. სახალხო დაფინანსების რამდენიმე სახე არსებობს: დონაციაზე დაფუძნებული სახალხო დაფინანსება, რომელიც გულისხმობს შემოწირულობის შეგროვებას მხარდამჭერებისაგან თქვენი პროექტისთვის. წახალისებაზე დაფუძნებული crowdfunding-ს შემთხვევაში, პროექტის ავტორი შემომწირველს სიმბოლური ჯილდოთი უხდის მადლობას. წილზე დაფუძნებული სახალხო დაფინანსება გულისხმობს, რომ შემომწირველები მხარდაჭერის სანაცვლოდ კომპანიის აქციების გარკვეულ პროცენტს იღებენ. და ბოლოს, სესხზე დაფუძნებული დაფინანსება, რომლის დროსაც პროექტის ავტორი ვალდებულებას იღებს, რომ შემოწირულობას დააბრუნებს გარკვეული დროის შემდეგ.

სახალხო დაფინანსების რომელ სახეს აირჩევ შენი პროექტის საჭიროებებზეა დამოკიდებული. თუ გაქვს იდეა, რომელიც გსურს რეალობად აქციო ან გახდე რაიმე ღირებულის ნაწილი და დონაციით გააძლიერო რომელიმე რეგიონი, სახალხო დაფინანსების პლატფორმა სწორედ ამ შესაძლებლობებს იძლევა!
მეტი იდეების კონკურსის შესახებ

გაწუხებს შენი სოფლის ან ქალაქის პრობლემები? გინდა შეცვალო შენი თემის ცხოვრება უკეთესობისკენ?

თუ გაქვს დრო, ენერგია, კრეატივი და იდეა, თუ ხარ ბლოგერი, IT სპეციალისტი, არქიტექტორი, სტუდენტი, მასწავლებელი, ჟურნალისტი, საჯარო მოხელე, მხატვარი, დიზაინერი, მეწარმე თუ უბრალოდ აქტიური მოქალაქე, თუ არ გინდა გულხედაკრეფილი ელოდო, როგორ იცვლება შენი თემის, სოფლის, ქალაქის ქუჩები, უბანი, სკოლა, ბაღი, პარკი და ახალგაზრდების ცხოვრება, მაშინ შენ თვითონ შეცვალე შენი თემის ცხოვრება უკეთესობისკენ!

„ორბელიანის“ იდეების კონკურსი ნაბიჯია ცვლილებებისკენ!

წარმოადგინე, შენი იდეა ჩვენს პლატფორმაზე – რა გინდა შეცვალო შენს თემში/სოფელში/ქალაქში. მონაწილეობის შედეგად კი :
- – შენს იდეას საკონკურსო ჟიური განიხილავს;
- – გამარჯვების შემთხვევაში მიიღებ დაფინანსება შენი იდეისთვის!
- – განავითარებ შენს იდეას დარგის ექსპერტების და თანამოაზრეების დახმარებით;
- – მიიღებ მონაწილეობას ტრენინგებში ადვოკატირებასა და თემის მობილიზებაში და გაიცნობ სხვა აქტივისტებიც;
- – იდეის განხორციელების შემთხვევაში შეგეძლება გაუზიარო წარმატებას სხვა დამწყებ პროექტის ავტორებს!
ეკოლოგია, გამწვანება, ტრანსპორტი და მობილობა, განათლება და

ახალგაზრდების ჩართულობა, ურბანული სივრცის განვითარება თუ კულტურა.

რას ეხება შენი იდეა?

იდეის წარდგენა შეუძლია ყველას, მთელი საქართველოს მასშტაბით, მათ შორის: ინდივიდებს, საინიციტივო ჯგუფებს,სამოქალაქო მოძრაობებსა და აქტივისტებს.

იდეების წარდგენა შესაძლებელია პლატფორმაზე რეგისტრაციის გავლის შემედეგ.

კონკურსის შესახებ მეტი ინფორმაცია შეგიძლიათ მოიძიოთ ჩვენს ფეისბუქ გვერდზე – Orbeliani Meti • ორბელიანი მეტი

დამატებითი ინფორმაციისთვის მოგვწერეთ ფეისბუქზე ან მეილზე – orbelianimeti@gmail.com

კამპანიის შინაარსი

ეზოს შესახებ

#GROWYOUROWNFOREST ჩემს მეხსიერებაში ერთერთი ყველაზე ძველი ფრაგმენტია, როცა ეზოში ვთამაშობდი და შემთხვევით დავაკვირდი როგორ ამოდიოდა ბალახი მიწიდან, ერთი შეხედვით არაფრით გამორჩეული სურათია, მაგრამ დღესაც მჯერა რომ რაღაც ძალიან მნიშვნელოვანს შევესწარი.

2020 წლის 15 თებერვალს წამოვედი სამსახურიდან და მაგ დღის შემდეგ დაიწყო ჩემი ეზოს ურბანულ ბაღად გარდაქმნის პროცესი.

პირველად მაშინ მოვაგროვეთ მე და ჩემმა მეგობარმა რუსთავის ერთერთ სკვერში ჰიმალაის კედარის 70 მდე ნერგი და ჩავრგეთ სპეციალურად შემოღობილ სივრცეში.

შემდეგ უკვე ისე განვითარდა მოვლენები თავადაც, რომ არ ველოდი. დღეს უკვე მშობლებს, მასწავლებლებსა და ახალგაზრდულ ორგანიზაციებს ეზოში მოჰყავთ ბავშვები. ვატარებთ სხვადასხვა აქტივობებს, პრეზენტაციებს, პრაქტიკულ სამუშაოებს, ვლაპარაკობთ ურბანულ მებაღეობაზე, ეკოლოგიაზე, ნარჩენების რეციკლირებაზე და რაც მთავარია, ამ დროის განმავლობაში დაგროვილ ცოდნას სიამოვნებით ვუზიარებ მათ.

ჩემი მთავარი მამოძრავებელი იდეაც ეს არის, რომ დავეხმარო ადამიანებს და განსაკუთრებით ბავშვებს გაიხსენონ და გაიაზრონ თუ რამდენად მნიშვნელოვანია ეკოლოგიის და გარემოს მიმართულებით რეგენერაციული მიდგომები, რამდენად აუცილებელი და საჩქაროა იმის გააზრება რომ ის გარემო რაშიც ვცხოვრობთ მხოლოდ ზრუნვის, ყურადღების და მოქმედების შემთხვევაში გაუმჯობესდება.

ჰიმალაის კედარი/Cedrus Deodara

რუსთავის მწვანე საფარი ასაკით ზუსტად იმხელაა რამხელაც თვითონ ქალაქი. ჰიმალაის კედარიც მაშინ ჩამოიტანეს როცა მშენებლობა დაიწყო. ქალაქის მასშტაბით ამ სახეობის საკმაოდ კარგი პოპულაცია გვაქვს და ყოველ გაზაფხულზე ბუნება გვაძლევს ათასობით ახალ ნერგს. წელს 250 ზე მეტი კედარის გადარჩენა შევძელი და აქედან უკვე ყველა გაჩუქდა. სამწუხაროდ დანარჩენ ნერგებს ვკარგავთ. მათი 95% ივნისის თვემდეც ვერ აღწევს.

ამ ამბის კარგი ნაწილი ის არის, რომ ეზო მზად არის ბევრად მეტი ნერგი შეიფაროს და გადაარჩინოს. უბრალოდ ამისთვის საჭიროა სანერგე/თავშესაფარის მოწყობა.

SANCTUARY

პროექტის წარმატების შემთხვევაში, ეზოში უკვე არსებული კონსტრუქცია (რომელსაც ვიყენებ საწყობად) გადიდდება და გადაკეთდება სანერგე/სათბურად. ეს მოგვცემს შესაძლებლობას გადავარჩინოთ და შემდეგ ისევ ქალაქის სივრცეებს დავუბრუნოთ 1200 - 1500 მდე ნერგი(წლიურად). გარდა ამისა სხვა აქტივობებთან ერთად ამ სივრცეში ბავშვები შეძლებენ მიკროსკოპით დააკვირდნენ სხვადასხვა პროცესებს, რაც უფრო აღქმადს გახდის მათთვის სიცოცხლეს და მის მრავალფეროვნებას.

დღესაც, როცა ვხედავ როგორ სკდება გირჩიდან გადმოვარდნილი თესლი, შემდეგ როგორ ყალიბდება პირველი წიწვები და როგორ ვითარდება ფესვთა სისტემა - იგივე განცდა მაქვს, როგორც მაშინ, როცა მიწიდან ამოსულ ბალახს ვუყურებდი, რაღაც ძალიან მნიშვნელოვანის შემსწრე ვარ. მჯერა მხოლოდ ამ გზით, მხოლოდ ბუნებაზე დაკვირვების და გააზრების გზით მხოლოდ აქ და ახლა ეყრება საფუძველი - ჯანსაღ, მომავლის საზოგადოებას. საზოადოებას, რომელიც იქნება ჰარმონიული, მშვიდი და ბუნებასთან ბალანსში მყოფი.